Your basket is currently empty!
Getur þú gefið þeim annað tækifæri?
Það er fátt sem jafnast á við tilfinninguna þegar hrædd kisa byrjar að treysta manneskjunni sinni. Fyrir sumar tekur það þolinmæði og tíma að ná þangað, á meðan aðrar eru strax svo ánægðar að komast í öruggt húsnæði hjá ástríku fólki.
Kisurnar okkar eru margar hverjar fyrrum villikisur, kisur sem fundust á vergangi eða voru afhentar félaginu þegar fyrri eigendur gátu ekki sinnt þeim lengur. Að okkar mati eiga allar kisur rétt á öðru tækifæri og við leggjum okkur öll fram við að gefa kisunum ást og umhyggju á meðan við finnum þeim framtíðarheimili.
Hverjum vilt þú bjóða fallega framtíð?
Allir kettir og kettlingar á okkar vegum afhendast ormahreinsaðir, bólusettir, örmerktir og geldir/teknir úr sambandi. Fyrir það er greidd hófleg upphæð til að mæta kostnaði, en nánari upplýsingar eru veittar í umsóknarferlinu.
Mikil hreyfing er á kisunum í okkar umsjá og því enda ekki allir kettir og kettlingar hér á vefnum. Þér er velkomið að fylla út umsókn og ef við teljum umsóknina henta ketti eða kettling á okkar vegum þá höfum við samband. Ef þú ert með einhverjar óskir varðandi persónuleika, inni- eða útikött o.s.frv. þá máttu endilega taka það fram í umsókninni. Við gerum okkar besta til að finna heimili við hæfi sem henta kisunum okkar.
Vinsamlega hafðu í huga að öll okkar vinna er unnin í sjálfboðavinnu og því náum við ekki að svara öllum umsóknum. Þér er velkomið að endurnýja umsóknina til að minna á þig.
Vilt þú vera með?
Við sendum árgjald félagsins í upphafi árs, en þér er velkomið að skrá þig hvenær ársins sem er. Smelltu hér að neðan til að bætast á lista yfir velunnara Villikatta, en skráningin virkjast þegar búið er að greiða árgjaldið, sem er aðeins 3.800 kr á ári. Hægt er að millifæra inn á reikning 0515-26-710314, kt. 710314-1790 og senda okkur staðfestingu á villikettir@villikettir.is. Athugið – færslugjald bætist við á greiðsluseðla sem sendir eru í heimabanka.
Veistu um kött í neyð?
Ef þú vilt koma til okkar ábendingu um kött í neyð þá er þér velkomið að senda okkur tölvupóst á hjalp@villikettir.is, senda okkur skilaboð á Facebook eða senda inn nafnlausa ábendingu í gegnum form hér á síðunni.
