Aðalfundur Villikatta verður haldinn þann 30. mars 2025 kl 13:00 í húsnæði Iðunnar fræðsluseturs að Vatnagörðum 20, 104 Reykjavík. Á dagskrá eru hefðbundin aðalfundarstörf.
Hægt er að taka þátt í aðalfundi í gegnum streymi. Þeir félagsmenn sem vilja taka þátt í streymi, verða að tilkynna slíkt og senda inn tölvupóst á villikettir@villikettir.is, í síðasta lagi tveimur dögum fyrir fund og taka fram nafn og kenntiölu. Þeim verður þá sendur hlekkur á fundinn. Aðeins félagsmenn geta tekið þátt í streymi.
Frestur til að skila inn framboðum í stjórn félagsins og tillögum að lagabreytingum rennur út þann 16. mars. Framboð skulu send á netfang félagsins villikettir@villikettir.is, þar sem tekið er fram nafn og kennitala og hvort framboð er í stjórn eða varastjórn.
Samkvæmt 8. gr. í lögum Villikatta þá er formaður kjörinn til eins árs í senn og meðstjórnendur skulu kosnir tveir í einu til tveggja ára. Því er kosið um formann og tvo meðstjórnendur árið 2025. Anna Jóna Ingu Ólafardóttir og Ragna Þorsteinsdóttir eru sjálfkrafa áfram í stjórn.
Tillögum að lagabreytingum skal einnig senda á villikettir@villikettir og þurfa að berast stjórn viku fyrir aðalfund. Nýiir meðlimir geta ekki haft áhrif á eða komið með tillögur að lagabreytingum fyrr en á öðrum aðalfundi eftir fulla meðlimagildingu.
Kjörgengi til stjórnar eru meðlimir sem að hafa haft fulla meðlimagildingu í 2 ár, nema að fengnu samþykki sitjandi stjórnar.
Nú enn eitt árið er liðið, það tíunda í sögu Villikatta. Árið 2024 var viðburðaríkt að mörgu leiti, skemmtilegt en afskaplega krefjandi. Það sem stóð upp úr á árinu er krafturinn og dugnaðurinn í sjálfboðaliðum félagsins, sem eru boðin og búin að fara út í hvaða veðri sem er, fórna tíma sínum og auka fermetrum fyrir ókunnugar kisur í neyð. Þó að það sé einstaklega gefandi að vinna með kisurnar okkar, þá er það erfitt og töluverð vinna sem býr að baki hverrar kisu sem kemur í hús, sem fær fæði og dýralæknaþjónustu á vegum félagsins og þar til hún fer heim eða á sitt framtíðarheimili. Við erum með fjöldan allan af sjálfboðaliðum um allt land sem sjá til þess að kisurnar okkar komist inn í hlýjuna og fái þá aðstoð sem þær þurfa.
Stóru verkefnin
Nokkur stór verkefni hafa staðið upp úr á árinu. Árið hófst með hvelli, þegar enn eitt eldgosið varð til þess að neyðarstigi var lýst yfir á Suðurnesjum, en þar stefndi í að hraunið myndi valda heitavatnsleysi á stóru svæði á köldum vetrarmánuði. Þá voru góð ráð dýr, en 23 kisur þurftu nauðsynlega að komast í örugga hlýju. Með frábærri samvinnu sjálfboðaliða hjá nokkrum deildum á suðvesturhorninu tókst að koma öllum kisunum til annarra deilda, í kot og á fósturheimili – og margar kisur fundu sín framtíðarheimili áður en það kom að því að fara aftur heim á Reykjanesið.
Júlí mánuðurinn var stærsti mánuðurinn hjá okkur í nýskráningum á kisum, en þá komu til okkar um 60 kisur! Stór partur af þessum fjölda kemur úr stóru verkefni sem Vestfjarðardeildin okkar lagðist í og við þurftum meðal annars að treysta á flugfélög til að koma köttum á milli landshluta svo hægt væri að koma þeim öllum í skjól.
Á svipuðum tíma stóð Suðurlandsdeildin í öðru eins verkefni, þar sem þurfti að tæma svæði og ná inn eins mörgum læðum og kettlingum og hægt var. Á þessum tíma vorum við með yfir 200 ketti á okkar framfærslu, þar af um 60 kettlinga sem þurfti að ala upp og gera tilbúin fyrir heimili. Til samanburðar þá vorum við með um 80-90 kettlinga allt árið 2023.
Á haustmánuðum náðist einnig að ganga frá samningi við Flóahrepp á Suðurlandi, sem er einstaklega gleðilegt þar sem Suðurlandsdeildin okkar hefur tekið á móti sínum skerf af köttum af svæðinu undanfarin ár.
Það kom okkur töluvert á óvart að desember var okkar næst stærsti mánuður. Meðal annars þá tókum við á móti um 30 jólaköttum af sama heimili, og í staðin fyrir hefðbundinn jólaundirbúning fór aðventan hjá mörgum sjálfboðaliðum í að redda þeim húsaskjól og dýralæknaþjónustu. Allt í allt þá aðstoðuðum við fleiri en 50 ketti í desember.
Við erum alltaf fegin að geta bjargað kisum úr svona aðstæðum, en raunin er að það er virkilega íþyngjandi fyrir félag eins og okkar að sinna þessum fjölda, finna húsnæði, greiða dýralæknakostnað og að finna heimili sem eru tilbúin að taka við kisum með lítil hjörtu. Þessi verkefni eru bein afleiðing þess að eftirlitsstofnanir og sveitarfélög eru ekki að sinna sínum skyldum hvað varðar dýraeftirlit og dýravelferð. Í mörgum tilfellum eru þar til gerðar stofnanir meðvitaðar um ástandið en gera lítið sem ekkert til að tryggja velferð dýranna. Eigendum er leyft að fresta eftirlitsskoðunum um marga mánuði og á meðan tvöfaldast eða þrefaldast magn katta. Við viljum ALLTAF vinna með og aðstoða eftirlitsstofnanir og sveitarfélög til að vinna í þessum málum, en okkar hendur eru bundnar og við getum ekkert gert án samþykkis eiganda eða í samvinnu við stofnanir sem bera ábyrgð á dýravelferð.
Það er okkar einlæga von að árið 2025 verði árið þar sem þessi málaflokkur fær yfirhalningu og stjórnvöld taki ábyrgð á því álagi sem liggur á mörgum dýraverndunarsamtökum trekk í trekk.
Viðburðir og fjáröflun
Í apríl bar til tíðinda á aðalfundi Villikatta, en Arndís Björg Sigurgeirsdóttir, einn stofnenda Villikatta og formaður félagsins til fjölda ára, rétti keflið áfram til nýrrar stjórnar og Jacobina Joensen tók við formennsku félagsins. Arndís er þó hvergi nærri hætt að sinna kisunum okkar, og heldur áfram mikilvægu sjálfboðaliðastarfi.
Við héldum líka upp á 10 ára afmæli félagsins í október síðastliðinn, og sá viðburður fór langt fram úr okkar björtustu vonum. Okkur hefur lengi langað til að halda viðburð sem þennan, til að sýna vinum og velunnurum okkar hvað felst í starfinu og fræða um kisurnar okkar. Dýrheimar lánuðu okkur sal og við áætlum að um 200 kisuvinir hafi heimsótt okkur yfir daginn og allt í allt safnaðist 401.000 kr í sölu og frjálsum framlögum.
Á árinu voru fjölmargir fjáröflunarviðburðir, svosem Purrlesque, Reykjavíkurmaraþon Íslandsbanka og listaverkauppboð til styrktar sjúkrasjóðs Villikatta. Þá stóðu sjálfboðaliðar einnig vaktina á fjölmörgum mörkuðum vetur, sumar, vor og haust, á bæjarhátíðum og kattasýningum.
Stuðningur
Síðastliðið sumar fengum við alveg hreint dásamlega sumargjöf og risa stuðning frá Dýrheimum og Royal Canin á Íslandi. Þar með hófst ótrúlega skemmtilegt og gefandi samstarf, en Dýrheimar lánuðu Villiköttum húsnæðið sitt fyrir 10 ára afmælið okkar, þar sem Theodóra Róbertsdóttir, dýrahjúkrunarfræðingur Dýrheima hélt fyrirlestur um næringu katta. Við hlökkum til frekara samstarfs við þau á komandi árum!
Petmark hefur einnig verið dyggur stuðningsaðili Villikatta í gegnum árin, og meðal annars styrkir alfarið útgáfu dagatals Villikatta eins og fyrri ár.
2024 í tölum
Alls voru um 600 kettir í okkar umsjá árið 2024 og rúmlega 200 kisur koma með okkur inn í nýtt ár.
😸 Um 400 „nýjar“ kisur komu til félagsins með einum eða öðrum hætti, þar af um 200 kettir sem koma af heimilum
💝 Tæplega 300 kisur fengu framtíðarheimili
🏠 Um 40 kisur fóru aftur heim til sín
🌲 13 villikisur fengu að fara aftur út, þar sem fólk fylgist með þeim og sér um að þær fái mat og aðstoð ef þær þurfa
💔 30 kisur fóru yfir regnbogabrúnna
Allar þessar kisur hafa skilið sitt eftir í hjörtum sjálfboðaliða og við höldum ótrauð áfram að sinna okkar skjólstæðingum og gera það sem í okkar valdi stendur til að tryggja velferð dýra á Íslandi.
Við horfum spennt til nýs árs, með nóg af spennandi verkefnum sem þarf að vinna og nýjum og gömlum kisum að kynnast.
Gleðilegt nýtt ár, kæru kisuvinir. Takk fyrir ómetanlegan stuðning á liðnu ári 😻
Vilt þú hjálpa?
Frjáls framlög hjálpa okkur langmest í okkar vinnu. Hægt er að leggja beint inn á eftirfarandi reikning:
Reikningsnúmer: 0515-26-710314
Kennitala 710314-1790
Einnig er hægt að styrkja okkur með að greiða árgjald Villikatta, sem við sendum út í upphafi árs, eða versla í styrktarversluninni okkar.
Þá er komið að næsta stjórnmálaflokki til að svara spurningum okkar sem varða málefni sem brenna á okkar félagi, en dýravernd og málefni villikatta er okkur afskaplega mikilvægt og við teljum þeirra svör geta haft áhrif á ákvarðanatöku okkar velunnara þegar komið er í kjörklefann.
Við sendum upphaflega 4 spurningar tengdar dýravelferð og málefnum Villikatta en vorum beðin um að fækka og einfalda spurningarnar okkar. Við sendum því aftur 3 spurningar á alla flokka.
Áttundi stjórnmálaflokkurinn til að svara spurningum okkar er Sjálfstæðisflokkurinn.
Er flokkurinn með mótaða stefnu í dýravelferðarmálum?
Sjálfstæðisflokkurinn leggur áherslu á dýravelferð sem hluta af sinni stefnu. Flokkurinn telur mikilvægt að í hvívetna sé farið að lögum og reglum, þ.m.t. lögum um dýravelferð.
Hver er afstaða þíns flokks til villikatta og tilverurétt þeirra?
Sjálfstæðisflokkurinn hefur ekki ályktað sérstaklega um villiketti í sinni stefnu en áhersla flokksins er almennt á samráð við samfélagið og jafnvægi milli mannúðarsjónarmiða og raunhæfra aðgerða í umhverfis- og velferðarmálum.
Myndi þinn flokkur styðja frumvarp til breytingaá lögum um velferð dýra, sem tryggir tilverurétt villikatta og festir í lögheimild til að beita hinni alþjóðlega viðurkenndu TNR-aðferðafræði?
Sjálfstæðisflokkurinn hefur ekki mótað sértæka stefnu um tilverurétt villikatta eða TNR-aðferðafræðina í stefnu sinni. Hins vegar byggir stefna flokksins almennt á virðingu fyrir fjölbreytni í náttúruvernd og áherslu á samráð við samfélagið í umhverfismálum. Því yrði Sjálfstæðisflokkurinn líklega fylgjandi slíku frumvarpi ef það fellur að þeim áherslum, þar sem mannúð og hagnýtar lausnir væru í forgrunni.
Við erum þá búin að fá svör frá átta stjórnmálaflokkum varðandi málefni villikatta og um dýravelferð: Viðreisn, Pírötum, Lýðræðisflokknum, Miðflokknum, Ábyrgri framtíð, Samfylkingunni, Vinstri grænum og Sjálfstæðisflokknum. Við bíðum enn eftir svörum frá Flokki fólksins, Sósíalistum og Framsóknarflokknum.
Spennan magnast núna í aðdraganda kosninga og við vonum að þessi svör gefi ykkur örlítið betri hugmynd hvað skal kjósa 30. nóvember næstkomandi.
Þá er komið að næsta stjórnmálaflokki til að svara spurningum okkar sem varða málefni sem brenna á okkar félagi, en dýravernd og málefni villikatta er okkur afskaplega mikilvægt og við teljum þeirra svör geta haft áhrif á ákvarðanatöku okkar velunnara þegar komið er í kjörklefann.
Við sendum upphaflega 4 spurningar tengdar dýravelferð og málefnum Villikatta en vorum beðin um að fækka og einfalda spurningarnar okkar. Við sendum því aftur 3 spurningar á alla flokka.
Sjöundi stjórnmálaflokkurinn til að svara spurningum okkar er Vinstrihreyfingin, grænt framboð.
Er flokkurinn með mótaða stefnu í dýravelferðarmálum?
Flokkurinn er ekki með stefnu er varðar dýravelferð hins vegar er hugmyndafræði dýravelferðar að finna í einhverjum af stefnum okkar eins og til dæmis þegar kemur að hvalveiðum, sem við viljum banna, sjókvíaeldi sem við viljum að sé bannað með öllu 2030 og hvað varðar landbúnaðarstefnu flokksins þar sem segir að “landbúnaður á Íslandi á að verða kolefnishlutlaus, stundaður í sátt við náttúruna með sjálfbæra nýtingu lands og velferð dýra í forgrunni” og í stefnu um loftslagsvá og náttúru þar sem segir:
“Mikilvægt er að heildarendurskoðun löggjafar um vernd, velferð og veiðar villtra fugla og villtra spendýra nái fram að ganga og stækka þarf griðasvæði sjávarspendýra í kringum landið.”
Flokkurinn hefur ályktað mjög mikið um dýravelferð til dæmi um hvalveiðar, blóðmerahald, eflingu dýralæknaþjónustu og almennt um dýravelferð:
“Flokksráðsfundur Vinstrihreyfingarinnar – græns framboðs, haldinn á Flúðum 26.-27. ágúst 2023, fagnar áherslubreytingum og aukinni umræðu í samfélaginu um velferð dýra. Fundurinn hvetur matvælaráðherra til að taka á þeim vanda sem snýr að dýravelferðareftirliti Matvælastofnunar (MAST) og efla það þannig að farið verði eftir öllum reglugerðum um velferð búfjár. Fundurinn telur að atvinnustarfsemi sem ekki getur staðist kröfur um velferð dýra eigi sér ekki framtíð á Íslandi. Því telur fundurinn brýnt að innleidd verði ný tækni og þekking í dýrahaldi til að auka velferð dýra enn frekar.
Flokksráðsfundurinn leggur áherslu á að kannaðir verði kostir þess að innleiða velferðarmerkingar á dýraafurðum eins og stefnt er að í Þýskalandi.”
Hver er afstaða þíns flokks til villikatta og tilverurétt þeirra?
Afstaða VG er sú að villikettir og önnur dýr eiga tilverurétt.
Myndi þinn flokkur styðja frumvarp til breytingaá lögum um velferð dýra, sem tryggir tilverurétt villikatta og festir í lögheimild til að beita hinni alþjóðlega viðurkenndu TNR-aðferðafræði?
Já.
Við erum þá búin að fá svör frá átta stjórnmálaflokkum varðandi málefni villikatta og um dýravelferð: Viðreisn, Pírötum, Lýðræðisflokknum, Miðflokknum, Ábyrgri framtíð, Samfylkingunni og Vinstri grænum. Við erum einnig komin með svör frá Sjálfstæðisflokknum sem kemur á vefinn okkar á næstu dögum. Við bíðum enn eftir svörum frá Flokki fólksins, Sósíalistum og Framsóknarflokknum.
Spennan magnast núna í aðdraganda kosninga og við vonum að þessi svör gefi ykkur örlítið betri hugmynd hvað skal kjósa 30. nóvember næstkomandi.
Við höldum áfram að krefja stjórnmálaflokka um svör við málefnum sem brenna á okkar félagi, en dýravernd og málefni villikatta er okkur afskaplega mikilvægt og við teljum þeirra svör geta haft áhrif á ákvarðanatöku okkar velunnara þegar komið er í kjörklefann.
Við sendum upphaflega 4 spurningar tengdar dýravelferð og málefnum Villikatta en vorum beðin um að fækka og einfalda spurningarnar okkar. Við sendum því aftur 3 spurningar á alla flokka.
Sjötti stjórnmálaflokkurinn til að svara spurningum okkar er Samfylkingin.
Er flokkurinn með mótaða stefnu í dýravelferðarmálum?
Þegar Samfylkingin og Vinstrigræn voru saman í ríkisstjórn árið 2013 voru ný lög um velferð dýra afgreidd á Alþingi. Þau mörkuðu tímamót í dýravernd á Íslandi. En síðan er liðinn rúmur áratugur og löngu kominn tími á endurskoðun laganna. Samfylkingin vill að mótuð verði markviss stefna um dýravelferð á Íslandi og skerpt á eftirliti með aðbúnaði og meðferð dýra. Við viljum gæta að réttindum dýra og veita umráðamönnum þeirra ráðgjöf og fræðslu um dýravelferð og þær lögbundnu skyldur sem fylgja dýrahaldi. Vernda þarf heimkynni villtra dýra þannig að líffræðilegum fjölbreytileika sé ekki ógnað og meta áhrif loftslagsbreytinga á vistkerfi íslenskrar náttúru.
Hver er afstaða þíns flokks til villikatta og tilverurétt þeirra?
Samfylkingin hefur ekki mótað sér afstöðu eða ályktað um villiketti og tilverurétt þeirra en er almennt fygjandi aukinni dýravelferð og auknum réttindum dýra.
Myndi þinn flokkur styðja frumvarp til breytingaá lögum um velferð dýra, sem tryggir tilverurétt villikatta og festir í lögheimild til að beita hinni alþjóðlega viðurkenndu TNR-aðferðafræði?
Samfylkingin telur tímabært að endurskoða dýraverndunarlögin er opin fyrir öllum breytingum sem tryggja aukna dýravelferð og réttindi dýra.
Við erum þá búin að fá svör frá sex stjórnmálaflokkum varðandi málefni villikatta og um dýravelferð: Viðreisn, Pírötum, Lýðræðisflokknum, Miðflokknum, Ábyrgri framtíð og Samfylkingunni. Við erum einnig komin með svör frá Vinstri grænum og Sjálfstæðisflokknum og munu þau svör tikka inn á vefinn okkar á næstu dögum. Við bíðum enn eftir svörum frá Flokki fólksins, Sósíalistum og Framsóknarflokknum.
Spennan magnast núna í aðdraganda kosninga og við vonum að þessi svör gefi ykkur örlítið betri hugmynd hvað skal kjósa 30. nóvember næstkomandi.
Við höldum áfram að krefja stjórnmálaflokka um svör við málefnum sem brenna á okkar félagi, en dýravernd og málefni villikatta er okkur afskaplega mikilvægt og við teljum þeirra svör geta haft áhrif á ákvarðanatöku okkar velunnara þegar komið er í kjörklefann.
Við sendum upphaflega 4 spurningar tengdar dýravelferð og málefnum Villikatta en vorum beðin um að fækka og einfalda spurningarnar okkar. Við sendum því aftur 3 spurningar á alla flokka.
Fimmti stjórnmálaflokkurinn til að svara spurningum okkar er Ábyrg framtíð.
Er flokkurinn með mótaða stefnu í dýravelferðarmálum?
Réttur fólks til að eiga gæludýr á að vera virtur og ekki bannaður af bæjarfélagi. Dýravelferð þarf að vera vernduð og dýraníðsatvik þurfa alltaf að vera tekin alvarlega af yfirvöldum. Endurskoða má lög um innflutning og ferðalög með gæludýr, til að draga úr álagi á íslenska gæludýraeigendur, t.d. vegna blindrahunda.
Hver er afstaða þíns flokks til villikatta og tilverurétt þeirra?
Ábyrg framtíð styður af heilum hug tilverurétt allra dýra, þ.m.t. villikatta. Við gætum t.d. stutt við aukin framlög til allra dýra-velferðarsamtaka, með að slík framlög yrðu frádráttarbær tekjuskattsstofni.
Myndi þinn flokkur styðja frumvarp til breytingaá lögum um velferð dýra, sem tryggir tilverurétt villikatta og festir í lögheimild til að beita hinni alþjóðlega viðurkenndu TNR-aðferðafræði?
Við styðjum TNR aðferðarfræðina og myndum styðja við að þau yrðu lögleidd.
Við erum þá búin að fá svör frá fimm stjórnmálaflokkum varðandi málefni villikatta og um dýravelferð: Viðreisn, Pírötum, Lýðræðisflokknum, Miðflokknum og Ábyrgri framtíð. Við erum einnig komin með svör frá Samfylkingunni, Vinstri grænum og Sjálfstæðisflokknum og munu þau svör tikka inn á vefinn okkar á næstu dögum. Við bíðum enn eftir svörum frá Flokki fólksins, Sósíalistum og Framsóknarflokknum.
Spennan magnast núna í aðdraganda kosninga og við vonum að þessi svör gefi ykkur örlítið betri hugmynd hvað skal kjósa 30. nóvember næstkomandi.
Við höldum áfram að krefja stjórnmálaflokka um svör við málefnum sem brenna á okkar félagi, en dýravernd og málefni villikatta er okkur afskaplega mikilvægt og við teljum þeirra svör geta haft áhrif á ákvarðanatöku okkar velunnara þegar komið er í kjörklefann.
Við sendum upphaflega 4 spurningar tengdar dýravelferð og málefnum Villikatta en vorum beðin um að fækka og einfalda spurningarnar okkar. Við sendum því aftur 3 spurningar á alla flokka.
Næsti stjórnmálaflokkurinn til að svara spurningum okkar eru Miðflokkurinn, en sá flokkur sendi ekki beint svör við spurningunum okkar heldur sendu eftirfarandi svar:
Miðflokkurinn styður að sjálfsögðu velferð dýra og er alltaf til umræðu um að bæta hana. Löggjöf okkar á Íslandi dregur dám af því sem tíðkast í nágrannalöndunum en þarf auðvitað alltaf að vera til endurskoðunar í ljósi nýrra upplýsinga og aukinnar þekkingar.
Hvað varðar villiketti sérstaklega þá hefur flokkurinn sem slíkur enga stefnu þegar kemur að málefnum þeirra. Innan Miðflokksins eru hins vegar miklir dýravinir sem hefði án efa áhrif á málefnalega afstöðu þeirra, komi málefni villikatta sérstaklega til umræðu á hinum pólitíska vettvangi.
Miðflokkurinn svarar hvorki hvort flokkurinn sé með mótaða stefnu í dýravelferðarmálum, né hvort flokkurinn myndi styðja frumvarp um breytingar á dýraverndunarlögum, sem myndu tryggja tilverurétt villikatta og festa í lög heimild til að beita hinni alþjóðlega viðurkenndu TNR aðferðerðarfræði (trap – neuter – return).
Við erum þá búin að fá svör frá fjórum stjórnmálaflokkum varðandi málefni villikatta og um dýravelferð: Viðreisn, Pírötum, Lýðræðisflokknum og Miðflokknum. Við bíðum enn svara frá Samfylkingunni, Vinstri grænum, Sósíalistaflokknum, Ábyrgri framtíð, Flokki fólksins, Framsóknarflokknum og Sjálfstæðisflokknum.
Við höldum áfram að krefja stjórnmálaflokka um svör við málefnum sem brenna á okkar félagi, en dýravernd og málefni villikatta er okkur afskaplega mikilvægt og við teljum þeirra svör geta haft áhrif á ákvarðanatöku okkar velunnara þegar komið er í kjörklefann.
Við sendum upphaflega 4 spurningar tengdar dýravelferð og málefnum Villikatta en vorum beðin um að fækka og einfalda spurningarnar okkar. Við sendum því aftur 3 spurningar á alla flokka.
Næsti stjórnmálaflokkurinn til að svara spurningum okkar eru Lýðræðisflokkurinn og þau ákváðu að svara öllum fjórum spurningunum sem við sendum upphaflega.
Er flokkurinn með mótaða stefnu í dýravelferðarmálum?
Flokkurinn er svo nýr að við höfum ekki getað mótað okkur heildstæða stefnu í dýravelferðarmálum.
Hver er afstaða þíns flokks til villikattta? Eiga villikettir tilverurétt að ykkar mati?
Starfsemi Villikatta og umrædd aðferð er til fyrirmyndar. Undirritaður hefur persónulega reynslu af því að fóstra ketti fyrir félagið sem er afar gefandi og þakkarvert.
Myndi þinn flokkur styðja frumvarp til breytinga á lögum um velferð dýra, sem tryggir tilverurétt villikatta og festir í lög heimild til að beita hinni alþjóðlega viðurkenndu TNR-aðferðarfræði?
Já
Við sendum allar þessar spurningar á alla flokka sem eru með staðfest framboð í alþingiskosningunum 2024. Við munum birta öll svör sem berast á næstu dögum og vikum.
Það hefur varla farið framhjá neinum að kosningar eru í vændum og því ákváðum við að senda nokkrar spurningar á þá stjórnmálaflokka sem eru í framboði þetta árið. Dýravernd og málefni villikatta er okkur afskaplega mikilvægt og við teljum þeirra svör geta haft áhrif á ákvarðanatöku okkar velunnara þegar komið er í kjörklefann.
Við sendum upphaflega 4 spurningar tengdar dýravelferð og málefnum Villikatta en vorum beðin um að fækka og einfalda spurningarnar okkar. Við sendum því aftur 3 spurningar á alla flokka.
Næsti stjórnmálaflokkurinn til að svara spurningum okkar eru Píratar og þau ákváðu að svara öllum fjórum spurningunum sem við sendum upphaflega.
Er flokkurinn með mótaða stefnu í dýravelferðarmálum?
Já. Píratar eru flokkur sem leggja ríka áherslu á dýravelferð og trúa að öll dýr eigi rétt á því að lifa í sátt og samlyndi við mannfólk. Píratar hafa harðlega gagnrýnt illa meðferð dýra og telja að frekara eftirlit og viðurlög þurfi að vera til staðar til að tryggja velferð þeirra.
Hver er afstaða þíns flokks til villikattta? Eiga villikettir tilverurétt að ykkar mati?
Öll dýr eiga tilverurétt og eiga skilið að lifa við viðunandi aðstæður þar sem velferð þeirra er tryggð. Villikettir eru þar með taldir og er mikilvægt að hægt sé að tryggja þeim viðunandi aðstæður og stuðning – í stað þess að notast sé við ómannúðlegar aðferðir eða þeim jafnvel útrýmt.
Að mati Pírata vinna Villikettir mikilvægt starf sem snýst um að finna mannúðlegar lausnir til að fækka fjölda villikatta og fækka kettlingum og særðum köttum sem þurfa að komast í skýli. TNR-aðferðin hefur reynst áhrifarík leið sem stuðlar jafnframt að dýravelferð og dregur úr álagi á kattaskýli.
Myndi þinn flokkur styðja frumvarp til breytinga á lögum um velferð dýra, sem tryggir tilverurétt villikatta og festir í lög heimild til að beita hinni alþjóðlega viðurkenndu TNR-aðferðarfræði?
Sem flokkur sem leggur ríka áherslu á dýravelferð væri slíkt frumvarp mál sem Píratar myndu styðja, af því gefnu að tryggt væri að framkvæmdin væri í höndum fagaðila til að tryggja velferð kattanna.
Við sendum allar þessar spurningar á alla flokka sem eru með staðfest framboð í alþingiskosningunum 2024. Við munum birta öll svör sem berast á næstu dögum og vikum.
Það hefur varla farið framhjá neinum að kosningar eru í vændum og því ákváðum við að senda nokkrar spurningar á þá stjórnmálaflokka sem eru í framboði þetta árið. Dýravernd og málefni villikatta er okkur afskaplega mikilvægt og við teljum þeirra svör geta haft áhrif á ákvarðanatöku okkar velunnara þegar komið er í kjörklefann.
Við sendum upphaflega 4 spurningar tengdar dýravelferð og málefnum Villikatta en vorum beðin um að fækka og einfalda spurningarnar okkar. Við sendum því aftur 3 spurningar á alla flokka.
Fyrsti stjórnmálaflokkurinn til að svara spurningum okkar er Viðreisn og við þökkum þeim kærlega fyrir að gefa sér tíma til að svara.
Er flokkurinn með mótaða stefnu í dýravelferðarmálum?
Viðreisn hefur ekki mótað sérstaka stefnu í þessum málaflokki. Við teljum að huga þurfi að almennt að velferð dýra og í samræmi við lög og reglur. Viðreisn í Reykjavík hefur t.d. mótað sér þá stefnu að borgin eigi að vera dýravæn borg, þar sem hugað er sérstaklega að því hvar heimilisdýr verða fyrir umferðarslysum, með það fyrir augum að skoða sérstaklega hönnun á umferðarmannvirkjum.
Hver er afstaða þíns flokks til villikatta og tilverurétt þeirra?
Viðreisn hefur ekki mótað neina sérstaka stefnu eða tekið formlega afstöðu til málefna villikatta. Um þá eiga að gilda sömu grundvallarreglur og um önnur dýr.
Myndi þinn flokkur styðja frumvarp til breytinga á lögum um velferð dýra, sem tryggir tilverurétt villikatta og festir í lög heimild til að beita hinni alþjóðlega viðurkenndu TNR-aðferðafræði?
TNR-aðferðafræðin (Trap-Neuter-Return) er notuð til að stjórna stofnum villikatta á mannúðlegan hátt. Hún fellur vel að gildum Viðreisnar og má vel skoða vandlega hvort heppilegt væri að lögfesta hana.
Við sendum allar þessar spurningar á alla flokka sem eru með staðfest framboð í alþingiskosningunum 2024. Við munum birta öll svör sem berast á næstu dögum og vikum.
