Author: admin
Hefur þú upplýsingar um eitrunarmálið í Hellisegerði í Hafnarfirði ?
Uppfært: Búið er að ná markmiðinu með verðlaunaféð, 102.300 kr. söfnuðust í pottinn
Félagið VILLIKETTIR hefur tekið að sér að halda utan um söfnun á verðlaunafé handa þeim sem kemur með upplýsingar sem leiða til ákæru á þeim sem er ábyrgur fyrir því að eitra fyrir köttum í nágrenni Hellisgerðis í Hafnarfirði. Ef þú vilt taka þátt í að leggja verðlaunafé í pottinn þá getur þú lagt inn á reikning 0111-26-73030 kt 710314-1790 – skýring verðlaunafé
Stjórn VILLIKATTA ætlar að leggja fram 20 þúsund krónur úr vasa stjórnarmeðlima til að starta söfnuninni.
Ef þetta verður ekki til að upplýsa málið þá rennur verðlaunaféð jafnt í Sjúkrasjóð VILLIKATTA og til DÝRAHJÁLPAR.
Þeir sem hafa einhverjar upplýsingar um málið er bent á að hafa samband við lögregluna í síma 444-1000 eða senda tölvupóst á abending@lrh.is
Upprifjun á samskiptum VILLIKATTA við MAST árið 2016
Í ljósi frétta um Brúnegg og gagnrýni á MAST sem eftirlitisstofnun þá langar okkur aðeins að rifja upp með ykkur samskipti okkar við þá stofnun á þessu ári vegna 3ja mála sem við tilkynntum til MAST á þessu ári.
- 100 katta málið
Í apríl 2016 hafði kona samband við okkur þar sem hún var komin í vanda með offjölgun á köttum. Hún hafði áður átt samskipti við MAST fyrir einhverjum árum og þá voru öll dýrin aflífuð. Konan gat ekki hugsað sér að láta dýrin verða aflífuð og hafði því samband við VILLIKETTI.
Við höfðum samband við MAST og létum vita af þessu og jafnframt að við myndum fara á staðinn og kanna aðstæður því konan hafði heimilað okkur það. Þar voru 100 kettir og 6 hundar. Mjög slæmt ástand var á staðnum, mikið af veikum köttum og kettlingum, enginn matur né sandur og ekkert rennandi vatn. Í þessari fyrstu ferð þá tókum við 27 ketti með okkur, veikustu dýrin og allar læður með kettlinga.
Við gáfum skýrslu til MAST og lýstum aðstæðum, og báðum þá að fara í málið. Okkar skilningur var að MAST myndi fljótlega heimsækja heimilið og kanna aðstæður. En ekkert gerðist vikum saman, svo við sáum okkur tilneyddar til að fara aðra ferð og sækja kettlingafullar læður og fleiri veikar kisur, auk þess að fara með meira af mat, kattasandskassa, bæli og sand, en við reyndum að sjá til þess að dýrin hefðu nóg á meðan við biðum eftir MAST. Þessi ferð var í lok apríl. Við létum MAST aftur vita af heimsókninni og aðstæðum.
Enn bjuggumst við við að MAST myndi fara á staðinn og kanna málið. Loks fóru þeir í eina heimsókn og það tók langan tíma að gefa út skýrslu sem send var eigandanum og henni gefinn frestur til úrbóta. Á meðan áttu dýrin að svelta, deyja og fjölga sér að vild. Við fórum því í 3ju ferðina til að sækja dýr, þann 27.4. og sóttum veikar kisur og fórum með mat og sand. 4. ferðina fórum við stuttu síðar, í apríllok 2016, tókum enn fleiri kisur og ennþá var eigandinn á fresti til að bæta ástandið. Þann 4. maí fórum við í 5. sinn og sóttum fleiri kisur og fórum með mat og sand. Þann 14. júlí var farið í 6. ferðina og sóttar veikar kisur, kettlingafullar kisur og nýgotnar læður og einnig 4 illa farnir hundar sem hundasamfélagið á Facebook tók upp á sína arma.
Þegar þarna var komið vorum við orðnar ansi súrar út í MAST sem hafði látið ástandið viðgangast síðan í lok mars, 3 og hálfur mánuður án þess að þeir gerðu neitt nema fara í 2 eftirlitisferðir á heimilið, skrifa skýrslu og gefa eiganda frest. Á meðan voru fárveik dýr á heimilinu sem sultu og kettlingar héldu áfram að fæðast. Niðurstaðan varð svo sú að það var „okkur“ að kenna að við hefðum farið að skipta okkur af þessu máli, þá var það komið á ábyrgð VILLIKATTA, við sátum uppi með allan kostnað sem af þessu hlaust og ábyrgðina á öllum dýrunum sem við björguðum úr þessum hörmungar aðstæðum.
Í lok júli voru eftir um 25 kisur í húsinu og 2 hundar. MAST taldi þá ástandið orðið viðundandi og gaf eiganda heimild til að halda þeim dýrum sem eftir voru. Við ákváðum því að fara með allar kisurnar sem eftir voru í geldingu og var það gert í 3 hollum, þannig gátum við tryggt að þær sem eftir voru myndu a.m.k. ekki halda áfram að fjölga sér.
Það reyndist okkur mjög erfitt að fá upplýsingar frá MAST á meðan á þessu máli stóð, þeir báru við upplýsingarstefnu stofnunarinnar og að stofnunin veitir ekki upplýsingar um aðgerðir hennar í málum sem eru í gangi hverju sinni.
Ábyrgðinni var varpað yfir á félagið Villiketti af því við stigum inn í málið, enda töldum við það skyldu okkar samkvæmt dýraverndarlögum að bjarga dýrum í neyð meðan stofnunin MAST aðhafðist lítið sem ekkert, nema skrifa skýrslur og gefa fresti á kostnað dýranna sem enn dvöldu við hungursneyð og veikindi.
- Mál meindýraeyðis sem sagðist hafa fangað 16 villiketti í Hafnarfirði, m.a. eyrnaklippta ketti sem Villiketti höfðu látið gelda í júlí 2016
Annað mál sem við tilkynntum til MAST á árinu var vegna meindýraeyðis sem sagðist hafa fangað 16 villiketti í bæjarlandi Hafnarfjarðar. Við nánari eftirgrennslan kom í ljós að Hafnarfjarðarbær hafði alls ekki beðið um þessa föngun og ekki heldur Heilbrigðiseftirlitið. Lögmaður Hafnarfjarðarbæjar og Villikettir sendu sameignilega kvörtun til MAST yfir framferði þessa meindýraeyðis þann 25.7.2016. Síðan þá hefur lögmaður félagsins ítrekað reynt að fá upplýsingar um gang mála og niðurstöðu en ekki verið svarað. Nú eru komnir rúmir 4 mánuðir síðan kvörtunin var send og ennþá ENGIN svör.
- Mál 6 kettlinga sem hent var út við ruslagám í Njarðvík
Þriðja málið sem við tilkynntum til MAST varðaði 6 kettlinga sem hent var út eins og hverju öðru rusli við gáma í Njarðvík í kringum 11. ágúst 2016. Því máli var vísað til meðferðar á stjórnsýslusvið, og þau áttu að taka ákvörðum um refsingu fyrir þetta brot. 7.11.16 var það mál ennþá í vinnslu á sviðinu þegar grunur kom upp um að aftur hefði kettling verið hent út af þessu heimili og við tókum hann inn.
Stjórn VILLIKATTA þykir ástæða til að MAST endurskoði verkferla sína þegar kemur að dýravelferðarmálum. Málin dragast allt of lengi og skortur er á viðbrögðum og úrræðum í svona málum. Sveltandi, deyjandi dýr þola ekki að bíða eftir að málið fari í gegnum margra mánaða skriffinskuferli sem svo kannski endar bara með aflífun dýranna vegna þess að önnur úrræði virðast ekki vera fyrir hendi. Engin dýraathvörf, enginn fjárstyrkur til góðgerðafélaga sem hugsanlega tækju að sér að sinna svona málum, engar lausnir nema aflífun dýranna.
Forstjóri MAST lofaði bótum og betrun í fjölmiðlum, nú er lag fyrir MAST að bæta úr ofantöldum vanköntum og svara þeim erindum sem við nefndum hér að ofan.
Umfjöllun Fjölmiðla um 100 katta málið:
https://www.villikettir.is/2016/07/27/adkoma-villikatta-ad-bjorgun-75-katta-ur-slaemum-adstaedum-a-sudurnesjum-i-mars-2016/
Umfjöllun Fjölmiðla um Meindýraeyðismálið:
http://www.mbl.is/frettir/innlent/2016/09/13/villikettir_hugsanlega_felldir_i_leyfisleysi/
http://www.mbl.is/frettir/innlent/2016/07/22/utilokar_adkomu_baejarstarfsmanns_3/
Umfjöllun um kettlingana 6:
http://www.dv.is/frettir/2016/6/28/sex-kettlingum-hent-eins-og-hverjum-odrum-urgangi/
http://www.vf.is/frettir/kettlingar-skildir-eftir-i-gardaurgangi/70548
Eitt annað mál sem Villikettir komu að snemma á árinu:
http://www.visir.is/-folk-sem-vildi-adstoda-en-var-i-raun-ad-gera-illt-verra-/article/2016160219374
Deildu þessari færslu á Facebook með því að smella á F hnappinn hér að neðan
Jólamerkimiðar 2016 komnir í sölu
Nýju jólapakka merkimiðarnir eru komnir. Þá prýða kisur úr 100 kattahúsinu sem við björguðum úr afar slæmum aðstæðum á þessu ári. Einnig eru þarna kettlingar sem félagið Villikettir hefur bjargað og komið á heimili á árinu. 20 stk. í pakka – 2200 kr. sendingargjald innifalið. Pantið á villikettir@villikettir.is eða í skilaboðum á facebook.
Einnig verður hægt að kaupa merkimiðana í verslun Máls og Menningar við Laugaveg, versluninni Iðu Ziemsen Vesturgötu 2a og verslunum ITA við Hótel Sögu og ITA – Iceland Travel Assistance | Grófin 1, 101 Reykjavík
Matarsöfnun fyrir villiketti 16.10.16
Þann 16.10. nk. er alþjóðlegi villikattadagurinn. Þennan dag ætlum við hjá VILLIKÖTTUM að hrinda af stað matarsöfnun fyrir villikettina. Við erum í samvinnu við Gæludýr.is og verðum staðsett með stöfnunarkerru við Smártatorg og Korputorg frá 16.10. til 22.10. Við munum vera á Smáratorgi að kynna félagið þann 16.10. en svo verður söfnunarkerran okkar á staðnum út vikuna þar og einnig í versluninni við Korputorg. Við tökum við öllum mat sem getur nýst villiköttum, blautmat, þurrmat, harðfisk, kisunammi, kattasand, leikföng, ullarteppi o.s.frv. Matarsöfnunin verður einnig í Reykjanesbæ, við Bónus Fitjum.
Við hvetjum alla til að leggja þessu verkefni lið og taka þátt í að gera líf villi- og vergangskatta bærilegra næsta vetur.
Aðkoma Villikatta að björgun 75 katta úr slæmum aðstæðum á suðurnesjum í mars 2016
Félagið Villikettir kom að björgun tuga katta sem haldið var í húsi á suðurnesjum en þar var eigandi með um 100 ketti á heimilinu ásamt 6 hundum. Kettirnir bjuggu við afar erfiðar aðstæður, margir veikir, hungraðir, kettlingafullar læður og kettlingar. Félagið hefur í Júlí þegar þetta er skrifað tekið til sín um 75 ketti og 4 hunda, en ennþá eru á heimilinu í kringum 30 kettir og 2 hundar. Hér fyrir neðan eru hlekkir á blaðagreinar um málið.
DV fjallar um málið
Reykjavík Síðdegis fjallar um málið
Matargatið
Matargatið er hugmynd sem varð til hjá nokkrum félagskonum. Þörfin var orðin töluverð mikil á matargjöfum á hverjum degi á nokkrum svæðum og til að koma til móts við það þá þróaðist þessi hugmynd. Matargatið tekur um 5-6 kg af mat og er viðhaldsfrítt með öllu, það er unnið úr gúmmíhellum, pípulögnum og plasti og þolir því vel að blotna. Kostnaður við hvert Matargat er um 6000 kr en með styrkjum þá vonumst við til að geta framleitt nokkur sem hægt er að dreifa á stærstu kattasvæðin.
Matargötin eru nú orðin 5 talsins og eru að nýtast kisunum stórvel. Maturinn helst þurr og fínn og kisurnar eru búnar að læra nokkuð vel á kerfið, stundum þarf að klóra aðeins eftir matnum og það eru þær farnar að gera. Þær eru í skjóli þegar þær nærast því skýlið nær nokkuð vel út yfir fóðurskálina. Við þökkum eiginmanni einnar félagskonu sérlega fyrir veitta aðstoð en hann hafði umsjá með framkvæmdinni frá a – ö
Ef þið viljið leggja okkur lið og styrkja þetta verkefni þá er styrktarreikningurinn hér : 0111-26-73030 kt 710314-179 það mætti setja í skýringu „Matargat“ en allur aur og styrkir stórir sem smáir er að sjálfsögðu vel þegnir.
Fyrsta Matargatið sem nú hefur verið endurbætt ognú nær skýlið niður á gúmmíbotninn og heldur því betur vætu frá enda veðurfarið á Íslandi ekki alltaf skemmtilegt.
Skýrsla stjórnar á Aðalfundi
Skýrsla stjórnar mars 2016 Ritað af Olgu Perlu Nielsen formanni félagsins.
Árskýrsla þessi greinir frá starfsemi Dýraverndunarfélags Villikatta, fyrir starfsárið 2015.
Síðastliðið ár var viðburðaríkt,lærdómsríkt og ánægjulegt, við erum að þróast sem félag bæði hvað varðar starfshætti og starfsreglur. Nokkur reynsla er nú komin á flesta verkþætti og getum við því mótað okkar eigin vinnuaðferðir og reglur enn betur.
Á þessu síðastliðna ári höfum við náð að gera enn meira og teygja okkur enn lengra í áttina að okkar markmiðum. En eitt af okkar markmiðum er að stækka og teygja okkur til allra landshluta, því vissulega eru villikettir alls staðar á landinu. Annað markmið okkar er að bæta við okkur mannsskap, bæði félagsmönnum og starfandi fólki innan félagsins. Á árinu eignuðumst við dygga samstarfsmenn á Suðurnesjum sem við er mjög þakklátar fyrir, og enn er að bætast þar í hópinn af góðu fólki, við hjálpumst að og erum í nánu sambandi daglega. Við hófum einnig samvinnu með Villikattahjálp Hafnarfjarðar og Dagný Björk Hreinsdóttur úr fyrrum Kettlingasjóði Nelsons, og erum við búinar að vinna mjög náið með þeim megnið af árinu og höfum við getað hjálpast mikið að og erum við mjög þakklátar fyrir þeirra elju og vinnusemi í þágu villikatta. Við höfum einnig verið í ágætu samstarfi við Kisukot á Akureyri.
Við höfum eins og ég sagði náð að færa út kvíarnar og erum nú að vinna á fleiri svæðum. Til að mynda í Vesturbænum, Grafarholtinu (geldingar + kettlingar), við erum einnig að vinna víða í Hafnarfirði ásamt Villikattahjálpinni og tókum einnig ágætis törn í Mosfellsbæ, og síðast en ekki síst á Suðurnesjum (Keflavík, Grindavík, Njarðvík) með okkar fólki þar og þar er einnig komin á samvinna með dýralækni Suðurnesja. Þegar að litið er heilt yfir árið þá höfum við náð að gelda allt að 100 ketti og náð inn yfir 100 kettlingum.
Félagið hefur náð að fjárfesta í fleiri fellibúrum til veiða, en félagið á að eiga um 13 búr í dag, en við unnum okkar fyrsta ár með 4 fellibúr, svo þetta er mikið til bóta. Einnig höfum við náð að fá gefins og keypt á góðu verði ýmis búr sem að vantar til starfseminnar.
Við náðum að stofna lítinn sjúkrasjóð sem við viljum gjarnan kalla sjúkrasjóð Móra, en hann var illa haldinn af krabbameini og náðist því miður ekki að bjarga honum, en næst þegar að illa haldið dýr kemur á okkr borð þá erum við tilbúnar með sjúkrasjóð sem getur nýst í lækniskostnað.
Eitt af því sem að þróaðist einnig á síðast ári var Kristukot, en það er lítið kettlingakot sem að notað er til að manna litla kettlinga, já og stundum stálpaða ketti. Kristukot er lítið hýsi þar sem allt er til alls, búr, kattasandsdallar og sandur, matur, leikföng ofl . og er öllum þeim kettlingum sem við náum komið fyrir þar í mönnun hjá Maríu og Signýju, en þær hafa að mestu átt heiðurinn af þessari starfsemi félagsins. Við viljum meina að hátt í 60 kettlingar hafi stoppað við í Kristukoti á síðasta ári.
Einnig fengum við til afnota upphitað gámahýsi til að hýsa gelda ketti eftir aðgerðir og einnig til að geyma ýmsan búnað í eigu félagisns, s.s búr og fæði. Við eigum þó eftir að koma honum frekar í gagnið til að hann geti nýst okkur betur en hann gerir nú.
Fjáröflun ársins var góð, en við nýttum okkur netsöfnun.is, og söfnun Maraþons Reykjavíkur, við vorum einnig með jólasöfnun, sem að gekk mjög vel, en þá vorum við með sölu á einstaklega fallegum jólagjafalímmiðum, sem seldust vel.
Þær dýralæknastofur sem að við höfum verið í samvinnu með á árinu eru: frumkvöðlarnir okkar á Dýralæknastofu Reykjavíkur, Dýralæknamiðstöð Grafarholts, Dýraspítalanum í Víðidal og Dýralæknastofa Suðurnesja. Og viljum við þakka þeim innilega fyrir þeirra samvinnu.
Annað sem að gaman er að nefna sem skeði á árinu en kemur okkar starfi ekki beint við en voru þó málefni sem við komum að voru… t.d málið með sjókisuna hana Særósu, en það var kisa sem að rataði óvart á frystitogarann Gnúp og dúsaði þar með sjómönnunum í góðu yfirlæti í rúmml tvo mánuði, en við vorum í góðum samskiptum við þessa herramenn og buðumst til að taka við henni þegar að hún kæmi í land og koma henni til manna sem að við svo gerðum. Annað heldur sorglegra mál var málið um hana Kjörnu kisu, en hún fannst kettlingafull í Kjarnaskógi á Akureyri þar sem að henni hafði verið hent út og endaði hún svo í Kisukoti á Akureyri en fékk þaðan svo heimili í hérna í Reykjavík. Þeir eigendur náðu ekki að tengjast henni nógu vel og ákvaðu að sleppa henni lausri í Hafnarfirði. Okkur var svo bent á hana af umhyggjusömu fólki sem var farið að gefa henni mat á hverjum degi í næstum 2 mánuði og fannst hún óvenju blíð. En við komum og sóttum hana og náðum að koma henni á endanlegt heimili á Suðurnesjum.
Einnig er gaman að segja frá því að okkar félagsmenn náðu að uppræta tvo kattasafnara eða cathordera, þar sem að um fleiri tugi katta var að ræða, og margir hverjir veikir og sýktir, þeim var komið undir læknishendur og á önnur og betri heimili.
Að lokum viljum veita eftirtöldum aðilum sérstakar þakkir: Má þar nefna Villikatthjálp Hafnarfjarðar (Arndísi K og Tinnu Rut) , Dagný Björk, Guðbjörg, Tobba og Helgunum á Suðurnesjum fyrir samstarfið, Völlu Jónu Eyglóardóttur sem tók sig til og handsmíðaði 4 litla kattakofa og gaf okkur, Sigrúnu Haraldsdóttur fyrir aðstoðina með heimasíðugerð ásamt Maríu Kristu, Áslaugu Eyfjörð, Brimdísi Klöru Runólfsdóttur ásamt Valgerði Guðsteinsdóttur og Anítu Yuan fyrir að vera frábær fósturheimili sem hægt er að leita til aftur og aftur , Gæludýr.is, Dýrheimar, Lífland, Icepet og SS fyrir fæði, hvort sem er gefins og með aflsáttarkjörum.
Aðalfundur Villikattafélagsins
Aðalfundur félagsins verður haldinn miðvikudaginn 16. mars í sal Volcano að Síðumúla 32, bakhúsi, keyrt upp rampinn við hlið Vouge og Álnabæs, 2.hæð. Almenn fundarstörf, lagabreytingar ef einhverjar, kosning stjórnar og opnar umræður. Atkvæðirétt á aðalfundi hafa þeir sem greitt hafa félagsgjöld í félagið.. Fundur hefst kl 17.00.
Fréttir
Villikettir eru komnir til að vera á Íslandi. Þeim hefur lítið verið sinnt fyrir utan einstaka dýravini. Viðhorf yfirvalda til þeirra hefur yfirleitt verið neikvætt og leitt til ómannúðlegra útrýmingarherferða. Flestir villikettir eru félagsdýr og hópa sig saman á svæðum þar sem einhverja fæðu er að finna. Markmið okkar er að stuðla að því að koma þessum dýrum til hjálpar með skipulegum aðgerðum. Þar vegur þyngst að ná dýrunum, gelda og framkvæma ófrjósemisaðgerðir. Rannsóknir erlendis sanna að TNR ( Trap – Neuter – Return ) eða Fanga-Gelda-Skila skilar mestum árangri í að fækka villiköttum og bæta velferð þeirra. Hér eru mannúðleg sjónarmið höfð í fyrirrúmi.